Monday, 26 September 2016

நாகினி - 5

அடுத்ததாக நாகினி இடதுசாரித் தலைவரைப் பார்க்க மூன்றாவது மாடியில் இருக்கும் கட்சி தலைமை அலுவலகத்துக்கு தன் உதவியாளருடன் செல்கிறார். அங்கிருக்கும் தோழர் ஜன்னல் வழியாக கீழே எட்டிப் பார்த்து, ‘தோழர் உங்களைப் பார்க்க ஆள் வந்திருக்காங்க’ என்று கத்துகிறார். ‘வரச் சொல்லுங்க’ என்று பதில் வருகிறது. நாகினியும் உதவியாளரும் ஆச்சரியத்துடன் ஜன்னல் வழியாகப் பார்க்கிறார்கள். அங்கு கட்சி அலுவலகம் முன்னால் இருக்கும் சுவரில் போஸ்டர் ஒட்டிக் கொண்டிருப்பவருக்கு ஏணியைப் பிடித்துக்கொண்டு நிற்கிறார் தேசியத் தலைவர்!

நாகினியின் உதவியாளருக்கு அதைப் பார்த்ததும் ஒரே ஆச்சரியம். மாடிப்படிகளில் இறங்கிவரும்போது தன் ஆச்சரியத்தை உதவியாளர் வெளிப்படுத்துகிறார்.

பிற கட்சிகளின் வார்டு கவுன்சிலரே பத்து சுமோ முன்னாலயும் பின்னாலயும் வெச்சிட்டு பவனி வர்றாங்க. இங்க என்னடான்னா முக்கியமான தேசியக் கட்சியின் தலைவராக இருந்தும் இப்படி எளிமையாக இருக்கிறாரே.

பக்கத்துல எங்கயாவது வீடியோ கேமரா இருக்கான்னு பாரு.

அப்படி இல்லை சார். கம்யூனிஸ்ட் தலைவர்கள் நிஜமாவே எளிமையானவங்க. ரெண்டு வேட்டி, ரெண்டு சட்டை இதுதான் அவங்க சொத்தா இருக்கும். எங்க கூட்டம் நடந்தாலும் பஸ்லயும் ரயில்லயும் ஏன் தேவைப்பட்டா லாரில கூட போக ரெடியா இருப்பாங்க. கிடைச்ச இடத்துல துண்டை விரிச்சுட்டு படுத்துப்பாங்கன்னு கேள்விப்பட்டிருக்கேன். கொள்கை மேல அவங்களுக்கு இருக்கற பிடிப்பு அப்படிப்பட்டது சார்.

தம்பி நீ இன்னும் நிறைய வளரணும்... இன்னிக்கு நாட்டுல அரசுத்துறைகள்ல இருக்கற எல்லா ஆடம்பரங்களையும் கூச்சமில்லாம அனுபவிக்கற ஒரே க்ரூப் இவங்கதான். எல்லா இடத்துலயும் உட்கார்ந்திருப்பானுங்க. தொழிற்சங்கம், அகடமிக் சர்கிள், மீடியான்னு இவங்க தான் எல்லாத்துலயும். அந்தக் காலத்துல பிராமணர்களுக்கு அரச தொடர்புகளும் சலுகைகளும் அளவுக்கு அதிகமா இருந்ததே அது மாதிரி இன்னிக்கு இடதுசாரிகள் இருக்காங்க. எங்கயுமே வேலையே செய்யாம சம்பளம் வாங்கறது.. எவ்வளவு வாங்கினாலும் பத்தாதுன்னு கொடி பிடிக்க வேண்டியது... மரத்தோட சத்து முழுவதையும் உறிஞ்சிடற ஒட்டுண்ணி வர்க்கம் இது. கேட்டா மக்களுக்காக போராடறோம்.. உரிமைக்காகப் போராடறோம்னு சொல்வாங்க. எங்கயாவது ஒரே ஒரு தொழிற்சாலையை இவங்க சொல்ற கொள்கைகளோட நடத்திக் காட்டியிருக்காங்களா... முதலாளிகிட்ட இருந்து பிடுங்கத்தான் தெரியுமே தவிர தானா எதையும் உருவாக்கிக் கொடுக்கத் தெரியாது. எளிமைனு சொல்றியே இந்த ஸ்பீஷிஸ் எல்லாம் வெளிய ஷோ காட்டத்தான். ஜுராஸிக் பார்க் பாத்திருப்பியே. சாது டைனசர் எல்லாம் வெளில இருக்கும் பின்னால இருக்கறது எல்லாம் பல தரப்பட்ட கொடூர டைனசர்கள். நீ எளிமையானவர்ன்னுசொன்னியே இவரோட வண்டவாளம் என்னன்னு அவர் கிட்ட நான் பேசும்போது நீயே தெரிஞ்சுப்ப பாரு.

இருவரும் சுவரெழுத்து எழுதப்படும் இடத்தை அடைகிறார்கள்.

லால் சலாம் காம்ரேட் என்கிறார் நாகினி கம்யூனிஸ்ட் தலைவரைப் பார்த்து.

லால் சலாம் காம்ரேட் என்று பதில் வணக்கம் சொல்கிறர் தலைவர்.

உங்க கிட்ட கொஞ்சம் தனியா பேசணும் காம்ரேட்.

வாங்க டீ குடிச்சிட்டே பேசுவோம்.

எனக்கு காஃபி கிடைக்குமா என்கிறார் நாகினி.

அது பூர்ஷ்வா பானமாச்சே.

அந்த காபி பயிர்களும் நம்ம பாட்டாளிகளோட வேர்வையும் குருதியும் பாய்ஞ்சுதானே பயிராகுது காம்ரேட்.

ஆமாம் ஆமாம் அது சரிதான் என்று சிரிக்கிறார் காம்ரேட்.

பானங்களைக் குடித்துவிட்டு கட்சி அலுவலகத்துக்கு அழைத்துப் போகிறார்.

என்ன விஷயம் சொல்லுங்க.

இந்த அணு ஒப்பந்தம் பற்றி நீங்க என்ன நினைக்கறீங்க.

அது நம்ம நாட்டுக்கு அவசியமே இல்லை தோழர்.

எப்படி சொல்றீங்க. மின்சாரம் தேவைதான.

மின்சாரம் தேவைதான். இல்லைன்னு சொல்லலியே அணு மின்சாரம் தான் வேணுமா? காற்றாலை, சூரிய சக்தின்னு எவ்வளவோ எளிய வழிகள் இருக்கே.

அதுல எல்லாம் கொஞ்சம் தான தோழர் கிடைக்கும். அதுவும் கொஞ்ச மின்சாரம் கிடைக்க நிறைய ஏக்கர் நிலத்தை வளைச்சுப் போடவேண்டியிருக்கும்.

அதெல்லாம் தப்பான பார்வை. பெரிய மின் உற்பத்தி மையம் எதுக்காக தேவை. அந்தந்த மாவட்டத்துக்கான மின்சாரத்தை அங்க அங்க உருவாக்கினாலே போதுமே. ஒரு இடத்துல இருந்து இன்னொரு இடத்துக்கு கொண்டுபோறதுல வர்ற மின் இழப்பையும் தவிர்க முடியும். நிறைய ஏக்கர்களை வளைக்கவேண்டிய அவசியமும் இல்லை. சூரிய மின்சாரத்தோட வசதியே அதுதான். எல்லாத்துக்கும் மேல அணு மின்சாரம் மாதிரி எந்த அபாயமும் இதுல இல்லை.

அணு மின்சாரத்துல என்ன அபாயம் இருக்கு?

அணு உலை வெடிச்சா அந்த மாவட்டமே காலியாகிருமே தோழர்.

ஆனா, இந்தியால இதுவரை 22 அணு உலை இருக்கு. எதுவுமே வெடிக்கலையே... சுமார் 30 வருஷத்துக்கு மேல நல்லாத்தான இயங்கிட்டு வருது. செர்னோபில் மாதிரியான விபத்தெல்லாம் இனிமே சாத்தியமே இல்லைன்னுதான சொல்றாங்க. அதைச் செஞ்சும் காட்டியிருக்காங்களே.

அது சரிதான் தோழர். ஆனா எப்போ என்ன நடக்கும்னு சொல்ல முடியாது. ஒருவேளை அப்படி ஏதாவது நடந்தா எத்தனை உயிர் போகும் அதை நினைச்சுப் பாருங்க. அப்படி அபாயமான ஒரு தொழில்நுட்பம் நமக்கு எதுக்கு. உலகத்துல்ல பெரும்பாலான நாடுகள்ல அணு மின் சாரத்தை வேண்டாம்னுதான் சொல்றாங்க. அப்படியே அணு உலையை வெச்சிருக்கற நாடுகள் கூட அந்த உலைக்கு பத்து மைல் சுற்று வட்டாரத்துல மக்கள் யாரையும் வசிக்க விடறதில்லை. ஏதாவது பிரச்னைன்னா குறைவான இழப்போட அங்க தப்பிச்சிட முடியும். ஜப்பான்ல கூட பாருங்க... சுனாமினால அணு உலை பாதிக்கப்பட்டபோது பெரிய இழப்பு எதுவும் வரலையே... நம்ம ஊர்ல அப்படியான பாதுகாப்பு ஏற்பாடுகள் கிடையாது. அணு உலை நிறுவனத்தோட காம்பவுண்டை ஒட்டியே மக்களும் வசிக்கறாங்க. நம்ம நாடு அணு உலைக்கானது இல்லை தோழர். அதெல்லாம் மக்கள் தொகைகுறைவான ஊர்களுக்குத்தான் சரிப்பட்டு வரும்.

இது எல்லாமே சரி... ஆனா அணு ஆயுதம் அப்படிங்கறது நமக்கு இன்னிக்கு மிகவும் தேவையானதுதான.

அப்படி வாங்க தோழர்... அணு மின்சாரம் ஒரு விஷயமே இல்லை... அணு ஆயுதம் தான் நம்ம நோக்கமே. அதனாலதான் அதை எதிர்க்கவும் செய்யறோம்.

பாகிஸ்தானும் சீனாவும் நம்மளைப் பார்த்து கொஞ்சம் பயப்படணும்னா நம்ம கைல அது இருந்துதானே தீரணும். நம்ம கிட்ட அணு ஆயுதம் இருக்கா இல்லையாங்கறது கூட முக்கியமில்லை. இருக்குமோன்னு எதிரி பயப்படணும். அப்பத்தான நமக்கு பாதுகாப்பு. அப்பத்தான் நம்மகிட்ட நட்பா இருப்பான்.

அணு ஆயுதத்தைக் காட்டி வர்ற நட்பைவிட அன்பைக் காட்டி வர்ற நட்புதான் பலன் தரும்.

ஸ்கூல் கட்டுரையையெல்லாம்வெச்சு நாட்டை ஆள முடியாது தோழர். தேச நலன் என்பது கொஞ்சம் கெட்ட காரியங்களையும் செய்யச் சொல்லும் தோழர்.

அரசாங்கம் தன் செய்யற எல்லாமே நாட்டு நலனுக்காகச் செய்யறதா சொல்லும். அதை எதிர்க்கறவங்களை எல்லாமே தேச விரோதிகள்னு சொல்லும்.

அது சரிதான். ஆனா, நியாயம், உண்மை அப்படிங்கறது ஒருத்தர் பக்கம் மட்டும்தான் இருக்கும். இல்லையா..? சரி...எனக்கு ஒரு சின்ன விஷயம் சொல்லுங்க... சிக்மா ஃபார்ம் ஹவுஸுக்கு எப்படிப் போகணும்..?

தோழர் திடுக்கிட்டு பின் சட்டென்று சுதாரிக்கிறார்.

சிக்மா ஃபார்மா..? அது எங்க இருக்கு?

அட்ரஸ் தெரியும்... எப்படிப் போகணும்னுதான் கேக்கறேன்.

அவங்களுக்கு போன் போட்டு கேளுங்க காம்ரேட்.

நாகினி ஒரு போனை எடுத்து நம்பரை அழுத்துகிறார். தோழரின் செல் ஒலிக்கிறது. அவர் யாரோ என்று நினைத்து எடுத்துப் பேசுகிறார்.

முன்னால் இருந்தபடியே நாகினி, ‘ஹலோ சிக்மா ஃபார்ம் ஹவுஸா’ என்கிறார்.

தோழருக்கு லேசாக பயம் வருகிறது.

நாகினி, சிக்மா ஃபார்ம் ஹவுஸின் முகவரியைச் சொல்கிறார்.

தோழர் லேசாக நடுங்கத் தொடங்குகிறார்.

போனை அணைத்துவிட்டு பேசுகிறார். சரி எனக்கு கொஞ்சம் வேலை இருக்கு. அந்த இடத்தோட உரிமையாளர்கிட்ட கேளுங்க தோழர் சொல்லுவாங்க.

அதான் உங்க கிட்ட கேட்கறேன் தோழர் என்கிறார் நாகினி.

நானா... அந்த ஃபார்ம் ஹவுஸுக்கும் எனக்கும் எந்த சம்பந்தமும் இல்லையே...

அப்படித்தான் அரசாங்க ஆவணங்கள்லயும் பதிவாகியிருக்கு. ஆனால், அதனோட உரிமையாளர் உங்களோட ஃபினாமின்னு சொல்றாங்களே...

யார் சொன்னா?

அந்த ஃபினாமியேதான்.

உங்களுக்கு தப்பான தகவல் கிடைச்சிருக்கு.

இந்த நாகினியோட குறி என்னிக்குமே தப்பாது தோழர்.

நாகினி என்ற பெயரைக் கேட்டதும் தோழருக்குத் தூக்கிவாரிப்போடுகிறது.

பிறகு சுதாரித்து, அது நீங்கதானா... உங்களைப் பத்தி நிறைய கேள்விப்பட்டிருக்கேன். பாக்கறது இப்பத்தான் முதல் தடவை.

நாகினியைப் பத்தி நிறைய கேள்விப்படலாம். அதை நேர்ல பார்த்தா ரொம்ப ஆபத்து தோழர். அந்த ஃபினாமி என்ன சொன்னார்ன்னா, நீங்க ஒரு வருசத்துக்கு முன்னால ஒரு கார்பப்ரேட் கம்பெனியை எதிர்த்து நடத்தின வீரம் செறிந்த போராட்டம் உண்மையிலயே இன்னொரு கார்ப்பரேட் கம்பெனிக்கு உதவறதாகத்தான் செஞ்சதா சொல்றாரு உண்மையா..?

மடத்தனமான பேச்சு.

அந்த ஃபார்ம் ஹவுஸ் கூட உங்களுக்கு அதுக்கான அன்பளிப்பா கிடைச்சதுன்னும் சொன்னாரு.

பொய்யான அவதூறு.

எல்லா ஆதாரமும் எங்க கிட்ட இருக்கு காம்ரேட். நீங்க மேற்கொண்ட வேற ஒரு போராட்ட நடைபயணத்தின்போது எந்த கிராமத்துல அந்த கார்ப்பரேட் கம்பெனிக்காரங்க உங்களை வந்து சந்திச்சாங்க... என்னவெல்லாம் பேசினாங்க... ஃபார்ம் ஹவுஸ் எப்படி கை மாறினது எல்லாம் எங்க கிட்ட இருக்கு தோழர். வேற ஒண்ணும் இல்லை. எந்த கார்ப்பரேட் கம்பெனி உங்களுக்கு எல்லாம் கொடுத்துச்சோ அவங்களேதான் எல்லாத்தையும் எங்ககிட்ட கொடுத்திருக்காங்க. முதலாளிங்களை எப்படி தோழர் இப்படி நம்பினீங்க. அவங்க உங்களைக் கவுக்க போட்ட பிளான் அது.

இதை நான் நம்பமாட்டேன். நான் மட்டுமில்லை யாருமே நம்பமாட்டாங்க.

அப்படின்னு நீங்க நினைக்கறீங்க... எல்லாரும் நம்புவாங்க தோழர். அதுவும் இதுமாதிரி லட்டு நியூஸ் கிடைச்சா வெச்சு சாத்திருவாங்க காம்ரேட்.

என் கட்சி என்னைக் கைவிடாது. ஏன்னா, இது கட்சிக்குத் தெரிஞ்சு நடந்த டீல்தான்.

அதெல்லாம் விஷயம் வெளிய வராம இருக்கறவரைதான். மாட்டிக்கிட்டா கட்சி உங்களை யாருன்னே தெரியாதுன்னு சொல்லிடும். உங்களோட 40 வருஷம், மூணு மாசம், 11 நாட்கள் கட்சிக்காக நீங்க செஞ்ச எல்லா தியாகமும் ஒரு நொடில தூக்கி எறியப்பட்டுவிடும்.

தோழருக்கு வேர்த்து ஊற்றுகிறது.

இப்ப நான் என்ன செய்யணும் என்று மென்றுமுழுங்கிக் கேட்கிறார்.

வேற ஒண்ணும் செய்யவேண்டாம். அணு ஒப்பந்தத்துக்கு ஆதரவு தெரிவியுங்க.

அதைக் கேட்டதும் அதிர்கிறார் தோழர்.

வாய்ப்பே இல்லை... கட்சி என்னைக் கொன்றே போட்டுவிடும்.

ஃபார்ம் ஹவுஸ் பத்தின செய்தி தெரிஞ்சா என்ன பண்ணும்?

நாகினியின் உதவியாளர், ‘அப்பயும் கொல்லத்தான் செய்யும்’ என்கிறார்.

நாகினி உதவியாளரை ஒருகணம் மேலும் கீழும் பார்க்கிறார்.

தோழர்... இவர் கொஞ்சம் போல இடதுசாரி ஆதரவு உள்ளவர். எளிய தொண்டர். இந்த கேஸ் விஷயத்தை அதனாலதான் இவர் கிட்டயே இதுவரை சொல்லலை. இவர் சொன்னா அது நிஜமாத்தான் இருக்கும்.

கம்யூனிஸ்ட் தலைவர் செய்வதறியாமல் தவிக்கிறார்.

பொதுக்குழு கூடித்தான் எந்த முடிவையும் எடுக்க முடியும்.

நல்லது. ஜனநாயகம்ங்கறது அதுதான். அப்படித்தான் இருக்கணும். நாட்டு நலன் தானே நமக்கு முக்கியம். ஆனா கட்சிக்கு கட்சிநலனும் முக்கியம். கட்சித் தலைவருக்கு அவரோட நலன் அதைவிட முக்கியம் இல்லையா.

யோசிச்சு பதில் சொல்றேன்.

இனிமே யோசிக்க இதுல என்ன இருக்கு தோழர். அதெல்லாம் ஃபார்ம் ஹவுஸை வாங்கறதுக்கு முன்னால யோசிச்சிருக்கணும். சரி... அமெரிக்கா கெட்ட நாடுதான்... அணு மின்சாரம் தப்புத்தான். ஆனாலும் இன்றைய நிலைல வேற வழியில்லை. அடுத்த கட்ட உலைகளை ரஷ்யாகிட்ட இருந்துதான் வாங்கறதா அரசுதரப்புல சொல்லியிருக்காங்கன்னு ஏதாவது சொல்லி கட்சியை சமாளிங்க. மக்கள்கிட்ட செல்வாக்கு குறைஞ்சிடுமேங்கற பயம் உங்களுக்கு தேவையே இல்லை இல்லையா...

தோழர் பெருமூச்சுவிடுகிறார்.

நாகினி விடைபெற்றுக் கொள்கிறார்.

புறப்படும்முன் லால் சலாம் என்று ஹிட்லருக்கு சல்யூட் வைப்பதுபோல் வைக்கிறார்.

தோழர் பதில் சொல்லாமல் இருக்கிறார்.

நாகினி சல்யூட் வைத்த கையை இறக்காமல் இருக்கவே, தோழர் தயங்கியபடியே, லால் சலாம் என்று பதில் வணக்கம் வைக்கிறார்.

நாகினி சிரித்தபடியே விடைபெறுகிறார்.

*