Monday 26 September 2016

நாகினி - 4

இதனிடையில் அமெரிக்கத் தரப்பில் ஒப்பந்தத்தை சீக்கிரம் முடிக்கச் சொல்லி கெடு விதிக்கிறார்கள். ஏனென்றால், நாலைந்து மாதங்களில் அமெரிக்க அதிபர் தேர்தல் வருகிறது. அதில் வெற்றி பெறும் வாய்ப்பு உள்ளதாக நம்பப்படுபவர் இந்தியாவுடனான அணு வர்த்தகத்தை விரும்பவில்லை. எனவே, இந்த அதிபர் இருக்கும்போதே ஒப்பந்தத்தை முடித்தாக வேண்டும். அதற்கு ஒப்பந்தத்தை இன்னும் ஓரிரு மாதங்களில் கையெழுத்திட்டாகவேண்டும். பிரதமரின் உதவியாளர் நாகினியை அழைத்து வேலையைச் சீக்கிரம் முடிக்கச் சொல்கிறார். நாகினியோ உள்துறை அமைச்சரைப் பற்றிய தகவல்களைச் சேகரிப்பது சிரமமாக இருக்கிறது. இப்போது ஆளும்கட்சியாக இருப்பதால் அவரை வீழ்த்துவது கடினம். கொஞ்ச கால அவகாசம் வேண்டுமென்கிறார். உதவியாளரோ அமெரிக்க நெருக்கடியைச் சொல்லி வேலையைத் துரிதப்படுத்தச் சொல்கிறார்.

நாகினி தன் உதவியாளருடன் அமர்ந்து ஆலோசிக்கிறார். அவர் எந்தப் பொறில மாட்டியிருக்கார்ங்கறது தெரியாம நாம எதுவுமே பண்ணமுடியாதே என்று நாகினி தன் உதவியாளரிடம் சொல்கிறார்.

அப்போ நம்ம பொறில மாட்ட வைக்க வேண்டியதுதான் என்கிறார் உதவியாளர்.

நாகினி உதவியாளரை, என்ன என்பதுபோல் பார்க்கிறார்.

தி எவர் க்ரீன், எடர்னல், எவர் வின்னிங் ஹனி டிராப்.

நாகினி மெள்ளச் சிரிக்கிறார்.

அதுல நமக்கு ஒரு கிக்கே இருக்காதே ப்ரோ என்கிறார்.

அவருக்கு இருக்கும் இல்லையா... அது போதும். நமக்கு அவர் செய்யப் போற உதவிக்கு அந்த நல்லதையாவது நாம செய்யணும் இல்லையா.

அது சரி...

அதுவும் போக நமக்கு டைம் இல்லை. இருந்தா நிதானமா ஸ்கெட்ச் போடலாம்.

ஓ.கே. கோ அஹெட் என்று அனுமதி தருகிறார்.

உள்த்துறை அமைச்சருக்கு மூட்டுவலி வருகிறது. நாகினியின் ஆள் மூலமாக ஆயுர்வேத மசாஜ் செய்துகொள்ளும்படி அவருக்கு ஆலோசனை சொல்லப்படுகிறது. அவரோ இந்திய பாரம்பரிய வழிமுறைகள் மேல் வெறுப்பு கொண்டவர். எனவே மறுத்துவிடுகிறார். வெஸ்டர்ன் ஸ்பாவுக்குச் செல்ல சம்மதிக்கிறார். அமைச்சரின் காட்டு பங்களாவுக்கு நாகினி தன் ஆளை அனுப்புகிறார். அவர் மின்சாரப் பணியாளர்போல் அங்கு போய் அமைச்சரின் வீட்டில் சி.சி.டி.வி.கேமரா ஒன்றை பொருத்துகிறார். சில நாட்கள் கழித்து அமைச்சர் ஓய்வெடுக்க அங்கு செல்கிறார். நாகினி ஸ்பாவில் இருந்து ஒரு பெண்ணை அழைத்து அங்குபோகச் சொல்கிறார். நான் அழைக்கவில்லையே என்று அமைச்சர் சொல்கிறார். இத்தனை தூரம் வந்துவிட்டேனே லேசாக சிறிது நேரம் மசாஜ் செய்துவிட்டுப் போகிறேன் என்று அந்தப் பெண் சொல்கிறார். சி.சி.டி.வி. கேமரா பொருத்தப்பட்டிருக்கும் அறையில் போடப்பட்டிருக்கும் டேபிளில் படுத்துக்கொள்கிறார். அன்று மசாஜ் புதிய பரிமாணங்களில் செய்யப்படுகிறது.

அது முடிந்த சில நாட்கள் கழிந்த பிறகு அந்த அமைச்சரை ஒரு பொது விழாவில் சந்தித்து, உங்களைக் கொஞ்சம் தனியா பார்த்துப் பேசணும் என்கிறார் நாகினி.

நீங்க யாரு... என்ன விஷயமா பார்க்கணும். என் பி.ஏ.கிட்ட அப்பாயிண்ட்மெண்ட் வாங்கிட்டு ஆபீஸ்லவந்து பாருங்க என்கிறார்.

இல்லை உங்களைத் தனியா பார்க்கணும். கட்சி ஆபீஸோ அமைச்சகமோ சரிப்படாது. நான் சொல்ற இடத்துக்கு நீங்க வாங்க என்கிறார் நாகினி.

அமைச்சருக்கு லேசாகக் கோபம் வருகிறது. பொது இடம் என்பதால் கண்ணியமாக நடந்துகொள்ள முயற்சி செய்கிறார்.

ஹலோ மேடம்... நீங்க யாரு... உங்களுக்கு என்ன வேணும்?

நீங்கதான் வேணும்.

அமைச்சர் முடியாது என்று சொல்லவே, ‘சரி உங்ககூட ஒரு செல்ஃபி எடுத்துக்கலாமா’ என்று கேட்கிறார். வேண்டாம் என்று சொன்னால் அவுட் டேட்டட் என்று சொல்லிவிடுவார்களோ என்று பயந்ந்து, அமைச்சர் சிரித்தபடியே போஸ்கொடுக்கிறார். நல்லா பதிவாகியிருக்கான்னு பாருங்க என்று நாகினி செல்லைக் காட்டுகிறார். அதில் காட்டு பங்களா மசாஜ் காட்சிகள் துல்லியமாகத் தெரிகின்றன.

அமைச்சருக்கு வேர்த்து ஊற்றுகிறது.

நாளைக்கு காலைல எட்டு மணிக்கு வீட்ல ரெடியா இருங்க. கார் அனுப்பறேன் என்கிறார் நாகினி.

அமைச்சர் பேயறைந்ததுபோல் தலையை ஆட்டுகிறார்.

மறுநாள் கார் வருகிறது. அமைச்சர் ஏறிக் கொள்கிறார்.

நான் நேரடியா விஷயத்துக்கு வர்றேன். அமெரிக்கத் தரப்புல அந்த ஒப்பந்தம் கையெழுத்தாகணும்னு விரும்பறாங்க... நீங்க அதுக்கு எதிர்ப்பு தெரிவிக்கக்கூடாது.

அது வந்து... எங்க கட்சியோட முஸ்லீம் வோட் பேங் அமெரிக்கா கூட ஒப்பந்தம் வைச்சுக்கறதை விரும்பலை...

அப்படின்னு நீங்க சொல்றீங்க...

இல்லை அது உண்மைதான்.

முஸ்லிம்களுக்கு அமெரிக்கா செய்யற அத்துமீறல்கள்தான் பிடிக்காது. அமெரிக்காவே பிடிக்காதுன்னு இல்லையே.

நான் இப்போ இதுக்கு சம்மதம் சொன்னா அவங்க முகத்துல முழிக்கவே முடியாது.

இந்த வீடியோ வெளியானா இந்த நாட்டுலயே யார் முகத்துலயும் முழிக்க முடியாது... இன்னொன்னு தெரியுமா அந்தப் பொண்ணு யாரு தெரியுமா என்று வீடியோவைக் காட்டுகிறார். அந்தப் பெண் மசாஜ் முடிந்த பிறகு பர்தாவை எடுத்து அணிந்துகொள்ளும்காட்சி அதில் இடம்பெற்றிருக்கிறது.

அந்தப் பொண்ணு முஸ்லீமா..?

யாருக்குத் தெரியும். கேமராவுக்கு முன்னால அந்த டிரெஸ்ஸைப் போட்டுக்கோம்மான்னு சொன்னேன். செஞ்சா. ரூமை விட்டு எளிய வந்ததும் ஒரே கச கசன்னு இருக்குன்னு சொல்லி கழட்டிட்டா... சரி... நல்லா யோசிங்க... ஒப்பந்தத்துக்கு ஆதரவு தெரிவிச்சு இன்னும் நாலைஞ்சு நாள்ல உங்கல் பேர்ல ஒரு அறிக்கை வந்தாகணும் என்று சொல்லிவிட்டு அமைச்சரை நாடாளுமன்றத்தில் இறக்கிவிடுகிறார்.

அமைச்சர் புறப்படும்போது நாகினி காருக்குள் இருந்தபடியே, இன்ஷா அல்லாஹ் என்கிறார்.

அமைச்சர் எதுவும் சொல்லாமல் அவரையே பார்க்கிறார்.

நாகினி இரண்டாவதுமுறையாக அதைச் சொல்கிறார். இந்தமுறை அது மிரட்டலாக ஒலிக்கிறது.

அமைச்சர் பதறியபடியே மாஷா அல்லாஹ் என்கிறார்.

கார் அமைச்சரின் உடையில் கரும் புகையை உமிழ்ந்தபடி புறப்பட்டுச் செல்கிறது.

அடுத்த நாளே அணு ஒப்பந்தத்தின் அவசியம் பற்றி பிரபல செய்தித்தாளில் அமைச்சரின் பெயரில் கட்டுரை வெளியாகிறது.

***

No comments:

Post a Comment